|
|
Alba u diplomua në Institutin e Arkitekturës Quasar
Dy javë më parë Alba përfundoi me rezultat Shkëlqyeshëm Institutin e Arkitekturës Quasar. Është shkollë private dhe nga më të mirët në Romë për profilin e vet. Alba zgjodhi specializimin në arkitekturën e brendshme, pasioni i saj i përhershëm.
E dinim përafërsisht ditën kur do të jepte provimin e fundit, atë të diplomimit, por nuk e ngutëm të na informonte. Na mori vetë në telefon. Sapo e kishte dhënë. Ishte shumë e emocionuar. Foli në fillim me Bardhën dhe pastaj me mua. Një çast e mbyti edhe ngashërimi. Kështu i ndodh Albës sa herë që kalon emocione të forta.
Ishte rezultati më i madh i saj në jetë.
Ardi nga gëzimi i kishte bërë dhuratë një paketë interneti me pagesë 20 euro në muaj (100 orë shërbim online). Kështu nisëm të shkëmbejmë edhe mesazhe e-mail.
Disa ditë më pas Alba na lajmëroi se kishte blerë me ofertë të mirë një makinë të përdorur Fiat Punto, me ngjyrë jeshile. U bënë me dy makina dhe Emit këtu tek ne i shkëlqyen sytë.
Doemos është një makinë që i duhet, sepse shpesh Ardi i lodhur nga puna duhej të nisej ta merrte në anën tjetër të Romës, kur në mbrëmje Alba lë turnin e saj në Upim.
 Version i printueshem
Faqja paraardhese |
|
|
